God jul og godt nyttår

Sjølv om det er jul og dei fleste av våre tilsette har teke velfortent juleferie, er nokre av oss i full sving med å drifte Noregs forskingsstasjonar – både i Antarktis og på Svalbard.

Våre folk på Troll i jula. Foto: Norsk Polarinstitutt

Medan mørketida pregar dagane her nord, opplever kollegaene våre på Troll-stasjonen i Dronning Maud Land den lysaste tida på året, med midnattssol og sørsommar.

– Det er travle dagar, men vi rekk å feire jul innimellom med god mat og hyggelege stunder saman, fortel seksjonsleiar Geir Ove Aspnes. Til dagleg jobbar han ved Svalbard-kontoret i Longyearbyen, men denne sørsommaren er han på Troll.

– For oss er det eigentleg lite som skil julaftan frå andre arbeidsdagar. Vi ringjer jula inn kl. 17.00 norsk tid, og første juledag startar vi litt seinare enn vanleg – kl. 11.00.

Han fortel at det skal bli godt med ein roleg start første juledag, før resten av høgtida som byr på vanlege 12-timarsdagar.

– Heldigvis sørgjer kjøkkenet for at det luktar jul gjennom heile høgtida.

Og vêret?

– Vi har hatt både snø og regn i lufta dei siste dagane, men no ser det ut til at vi får ei fin jul med sol.

Julaftan er det blå himmel på Troll! Vil du følgje vêret på andre sidan av kloden? Sjå webkamera her’

Våre folk i Ny-Ålesund i jula, frå venstre: Dagmara Wojtanowicz (feltteknikar), Arnt Rennan (vikarleiar Sverdrup), Kristian Alme (driftsingeniør) og Rune Jensen (vikarleiar Sverdrup). Bak frå venstre: Fieke Rader (forskingskoordinator), Jan Ivar Pettersen (logistikleiar), Gulli Aarnes (driftsingeniør) og Lars Erik Sørgård (driftsingeniør). Foto: Matteo-Mariano Chirico

Også ved den nordlegaste stasjonen vår er det julestemning. Her er det mørketid med polarnatt, og vêrhardt, men inne er det lyst, varmt og julestemning!

Kanskje fekk nokre av dykk eit glimt av gjengen ved Ny-Ålesund forskingsstasjon – Sverdrup på «Kvelden før kvelden» på NRK1 veslejulaftan? Om ikkje, kan du sjå julehelsinga her.

– Det blir nisse, gåver og god mat i jula, fortel forskingskoordinator Fieke Rader.

– Vi har også eit lite julekor som skal syngje nokre julesongar på julaftan.

Med dette ønskjer vi alle fine dagar på tampen av året og eit godt nyttår, uansett kvar du er på kloden.

Kontakt

Tekniske feil på nettsiden?

Henvendelser

Infrastruktur

Nyttig

Aktivitet i Antarktis?

Relaterte innlegg

Del dette innlegget