Regjeringa foreslår å auke løyvinga til Norsk Polarinstitutt i neste års statsbudsjett med 50 millionar kroner.
– Norsk polarforsking spelar ei viktig rolle for å forstå endringane i naturen og klimaet i Arktis og Antarktis. Med denne satsinga følgjer vi opp nordområdestrategien og styrkjer Noreg si rolle som ein leiande polarnasjon, seier klima- og miljøminister Andreas Bjelland Eriksen i ei pressemelding.
Dette er ei satsing som direktøren ved Polarinstituttet, Camilla Brekke, støttar fullt ut.
– Budsjettforslaget gjer det mogleg for oss å oppretthalde vår solide forskingsfaglege aktivitet i polarområda og levere på det breie oppdraget vi har i både Arktis og Antarktis, seier Brekke.
Den auka løyvinga gjer det mogleg å halde fram med planlagde tokt med Kronprins Haakon, inkludert forsking i Polhavet 2050 frå neste år, seier direktør Camilla Brekke. Foto: Norsk Polarinstitutt
Regjeringa foreslår mellom anna å løyve 33,7 millionar kroner meir til drift av forskingsfartøyet «Kronprins Haakon».
– Vi har hatt store kostnadsaukingar knytte til «Kronprins Haakon», og med den auka løyvinga kan vi oppretthalde den planlagde toktaktiviteten. Det betyr at vi allereie frå neste år kan kome i gang med tokt i forskingsprogrammet Polhavet 2050, og òg gjennomføre eit planlagt tokt i Sørishavet mot slutten av året, seier Brekke.
Regjeringa foreslår òg å auke løyvinga til transport av forsyningar til Troll forskingsstasjon i Antarktis med 9,3 millionar kroner. I tillegg vil regjeringa løyve 7 millionar kroner meir for å styrkje instituttet si forskingstilstadeværelse på Svalbard.
– Dette er heilt i tråd med Svalbardmeldinga og Noregs nye nordområdestrategi, Noreg i Nord, som peikar på Polarinstituttet si viktige rolle innan forskingsleiing på Svalbard, seier Brekke.
