Lite havis i Kongsfjorden

HAVISTJUKKLEIK Boring for måling av havistjukkleik. Foto: Sebastian Gerland / Norsk Polarinstitutt 

Årets feltarbeid for overvaking av havis i Kongsfjorden ved Ny-Ålesund er no avslutta. Undersøkingane vart gjennomførte i ein sesong med svært lite havis, avgrensa til dei mest inste områda av fjorden. Ein nyleg mildversperiode, med temperaturar over frysepunktet og periodevis regn, førte til snøfrie og svært glatte isoverflater der isen framleis låg att.

– Dette året fell tydeleg inn i kategorien med svært lite havis i Kongsfjorden, seier havisforskar Sebastian Gerland ved Norsk Polarinstitutt, nettopp heimkomen frå årets feltarbeid i fjorden. 

Feltarbeidet har omfatta boring for måling av istjukkleik og innsamling av iskjerner. Prøvane skal analyserast for å gi innsikt i dei fysiske, kjemiske og biologiske eigenskapane til isen. Slike målingar er viktige for å forstå korleis klimaendringar påverkar fjordsystema på Svalbard.

ISKJERNER Havisforskar Dmitry Divine pakkar iskjerner for seinare analyse. Foto: Sebastian Gerland / Norsk Polarinstitutt 

Naturlege variasjonar vs. klimaendringar

Kongsfjorden har stor betydning som forskingsområde fordi fjorden ligg i overgangen mellom kaldt arktisk klima og varmare atlantiske vassmassar. Variasjonane i havisdekket her gir difor tidlege indikatorar på klimaendringar i Arktis.

Ifølgje Gerland har år med lite havis vorte langt vanlegare enn før.

– Sjølv om vi av og til òg ser år med meir havis, er det no åra med lite is som dominerer. Dette har i aukande grad vorte den nye normalen, seier han.

Under årets kampanje, med base ved Ny-Ålesund forskingsstasjon, observerte forskarane både havisflak og små isfjell i inste delar av fjorden. I Raudvika, heilt inst i Kongsfjorden, låg det framleis fastis, men også her var snødekket i stor grad borte, eller omdanna til is.

Resultata frå årets feltarbeid vil inngå i langsiktige dataseriar som blir brukte til å dokumentere utviklinga i Arktis over tid. Slike tidsseriar er avgjerande for å kunne skilje mellom naturlege variasjonar og langsiktige klimaendringar.

FASTIS Fastis i Raudvika i indre Kongsfjorden, sett frå lufta. Foto: Sebastian Gerland / Norsk Polarinstitutt