Ny global FN-havrapport lansert

Norsk Polarinstitutt har bidrege med fagkunnskap i arbeidet med rapporten. Biologen Kit M. Kovacs og havforskaren Agneta Fransson har delteke som ekspertar innan sine felt: Kovacs om sjøpattedyr og Fransson om kjemisk tilstand og endringar i havet (inkludert fjordar på Svalbard).

BIDRAGSYTAR I HAVRAPPORTEN Agneta Fransson fotografert i samband med eit tokt ho leia i 2021 til dei sentrale og djupe delane av Nansen- og Amundsenbassenget. Der var hovudfokuset å samle kunnskap om havisen og dei øvste vasslaga om hausten, og samanhengen vidare ned mot botnsedimenta. Foto: Elin Vinje Jenssen / Norsk Polarinstitutt 

Ekspertar frå mange fag og land 

WOA III er den einaste globale vurderinga som samlar miljømessige, økonomiske og sosiale sider ved havet i éin og same rapport. Ho er hovudproduktet frå den tredje runden av FN sitt arbeid med å vurdere tilstanden i det marine miljøet, inkludert samfunnsøkonomiske tilhøve.

Over 650 ekspertar frå heile verda har vore involverte. Saman har dei lagt eit solid vitskapleg grunnlag for avgjerder hos styresmakter, i internasjonale fora og hos andre aktørar som arbeider med havspørsmål. Føremålet er å gi betre kunnskap som kan bidra til ei meir berekraftig forvaltning av havet.

PÅ TOKT Forskingsskipet Kronprins Haakon i fastisen aust for Grønland under eit tokt til Framstredet, havområdet mellom Svalbard og Grønland, i 2023. Fastisen hadde smelta mykje og er dekt av smeltedammar. Foto: Trine Lise Sviggum Helgerud / Norsk Polarinstitutt

Global havstatus 

Rapporten gir ei brei oversikt over tilstanden i hav og kystområde globalt. Han skal òg styrkje arbeidet med FN sine berekraftsmål, særleg mål 14 om livet i havet, og støtte opp om FN sitt havforskingstiår.

WOA III byggjer vidare på dei to føregåande rapportane. Den første etablerte eit felles kunnskapsgrunnlag, medan den andre oppdaterte dette. Den nye rapporten går lengre både ved å gi oppdatert status frå ulike regionar og ved å løfte fram nye tema. Mellom anna inneheld han analysar av moglege vegar mot ei meir berekraftig utvikling. Han legg òg større vekt på spørsmål om likestilling og rettferd, og inkluderer kunnskap frå urfolk, tradisjonelle brukarar av havet og lokalsamfunn.